أخبار عاجلة
الرئيسية » اداب » لقاء ساخر مع البومة !!! بقلم الأستاذ فؤاد نقوزي

لقاء ساخر مع البومة !!! بقلم الأستاذ فؤاد نقوزي

ضهرت من البيت زهقان ‏من الذي يحصل في البلد … غلاء…. انقطاع كهرباء ومياه… ومواد تموينية… ولحم … وبعت منقل الشوي وصرفت حقه…🙄 المهم مشيت عالطريق لوحدي .. لحتى وصلت عالغابة🙄 فتت لأتمشى… انا وماشي لقيت ليلى والذئب عم يلعبوا ومتفقين وتاتا على كرستها وعم تحكي عالتلفون🤪🤪 ومشيت شوي بلاقي روبن هود ورفقاتو عم بيوزعوا حصص تموينية…. انبسطت وشوي بمشي بعد بلاقي طرزان😳 طرزان ما غيرو اللي بلا تياب بيضلوا بس هالمرة لابس طقم وجامع كل الحيوانات عم يخطب فيهم عن محبة الوطن….. والاقزام السبعة وبياض الثلج ومبسوطين وهيك بقيت لحتى بلمح من بعيد بيت اسود مسكر الشبابيك… ومدخنة طالع منها دخان اسود….. فزعت، قربت شوي وبشوف باب مفتوح وفي عالمدخل هياكل عظيمة لناس قاعدين عالكراسي…. وحدّهم كمان هياكل وجماجم وحاملين يافطات…. اووف انا خفت … بس دفعني الفضول وفتت 🙄البيت معتم بس في ضو شموع .. وعالحيطان صور لهتلر ونابليون وراسبوتين ودراكولا…. وابو لهب…. وعالمكتب في كتب وريشة ومحبرة ولابتوب…. وملفات وتلفون قديم…. اقشعر بدني لما سمعت صوت مرعب😳 اهلاااااا نقوزي🙄 واذ بتفوت بومة قعدت عالمكتب وبتمها غليون وحاطة عيونات سماك….قلت
-: شو عرفك بإسمي طانت بومة…؟
-: ولوو انت نقذتني بدخولك….. المهم نعم ؟؟ أمر شو بتريد؟؟
-: ابداً عم بتمشى زهقان من هالوضع بالبلد … والغلا والقرف والحرب النفسية والاقتصادية…. وهيك….. طيب لأيمتى بدنا نخلص؟؟
أخدت البومة نفس من الغليون….ونفخت بالهوا دوائر وتنهدت وقالت اسمع يا ابني هالقصة..
-: بلدكم متل سفينة فيها كلب وبسينة وفارة قرروا يروحوا مشوار بالبحر …. جهز كل واحد منهم اكلاتو… لحمة ولبن وجبنة وعضام….. وبيرة وبزورات وشيبسي والذي منه….. وانطلقوا مبسوطين…. اغاني ورقص واكل… ودبكة…. وهيك شي شهر بالبحر لحتى مرة رح يخلص الاكل ونسيوا حالهم…. قرورا يرجعوا لانه تقريباً خلص الاكل وما في غير قالب قشقوان كبير….. فجأة انفختت السفينة وصارت المي تفوت 🙄🙄 ما معهم عدة قالوا منسدوا بقالب الجبنة ومشي الحال 😳 وبطريق العودة جاعوا…. صاروا باليل كل واحد ياكل شقفة من الجبنة…. يلاااه…. يلاااه لحتى رجعت المي تفوت ورح يغرق المركب….. علقوا مع بعض كل واحد يتهم الثاني بسرقة الجبنة…. وخبيط ومبسات…. وبوكسات وعض وخرمشة….. والمي عم تتسرب ورح يغرقوا…. لحتى استووا ورح يموتوا🙄🙄🙄مين شايفيهم ياشاطر؟؟؟ ههه واوي كان راكب جت سكي ولاحقهم عاللس😢 لما داخوا وتعبوا …نط الواوي عالمركب قتلهم وكبهم بالبحر وشال من جيبته اصبع ألتيكو …!!!! وسد التسرب …. واخد المركب وراااااااح……🙄🙄🙄
-: طانت بومة…. طيب الواوي شو عرّفه انه رايحيين……
-: بسلامة فهمك يا متعلم…. من وقت ما قرورا …. كل العالم عرفت….. والواوي ناطر بكل وقت ومكان….
وسكتت واخدت رشفة من فنجان مي النار وقالت لي-: يلاااه روح حبيبي درمل وانتبه لمركبك… وخلي عينك عالواوي🙄🙄🙄
-: طيب ستنا …. سؤال؟؟؟ هول الهياكل العظمية اللي براه…. شو قصتهم؟؟؟
-: يا ابني هول اللي حاملين يافطات تبع بالروح بالدم…. راحت روحهم …. وهوليك اللي على الكراسي….. تبعول اللي انفدوا بالروح والدم….. راحت روح الجميع….. وبقيت الهياكل للذكرى….. قوم بقى روح اتعشى ونام واحلم انه بلدك صار بلد…. وخلي عينك عالواوي ما ينط على بيتك!!!!
…. ضهرت من عندها وراسي مطوووش وعم فكر….. شو بعمل…. بحمل يافطة…. او بعمل زلمة زعيم او بحرس بلدي من الواوي؟؟؟ قلت احسن شي اعمل منقوشة زعتر وكباية شاي…😢تذكرت ما عندي سكر….. رحت ماشي للبيت وبعدها تاتا والذئب وليلى مبسوطين …. والاقزام السبعة عم يغنوا هالصيصان شو حلوين🎼🎼💃🏼💃🏼🙄وهيك يمكن عم يلطشني؟؟؟؟
هيدي قصتي عن جد صارت معي…..شو بتقولوا انتو؟؟؟؟
ملاحظة … حدا عنده سكر لكباية الشاي…؟؟؟؟🙄🙄🙄🙄

عن kalamhorr

يلفت موقع قلم حر ان المقالات التي ترده ويتم نشرها ليس بالضرورة انها تعبر عن سياسة الموقع الملتزم بالقضايا الوطنية والقومية والإسلامية انما تعبر عن اصحابها الذين يبقون مسؤولين عن كل ما يتعلق بها من الناحية القانونية. كما يهيب بالسادة القراء ان يحتفظوا بالمثل الأخلاقية العليا في تعليقاتهم وعدم التعرض للكرامات الشخصية من الفاظ او تعابير او اشارات نابية مع الاحتفاظ بحق الموقع بمقاضاة كل من لا يلتزم بما ذكر أعلاه

شاهد أيضاً

قصيدة المرأة التي تحب سبعة رجال من مختارات الحاج حسن ع.

امرأة تحب سبعة رجال وكانت شاعرة وأنشدت شعرا في حبها لسبعة رجال، أمام مجموعة من …

اترك تعليقاً

WP2FB Auto Publish Powered By : XYZScripts.com