أخبار عاجلة
الرئيسية » اداب » الراعي والخازوق ( الطب الذي لا يعرفه الحكيم)

الراعي والخازوق ( الطب الذي لا يعرفه الحكيم)

مهنة كادت ان تنقرض، لأن زمن التكنولوجيا اصبغ على هذه المهنة صبغة ظالمة ( رعية يوم بتيسنة سنة)..لهذه المهنة اصولها ومفرداتها التي قد لا نعثر عليها بمعاجم اللغة ولكنها تبقى لغة من التراث اللبناني عامة والجنوبي خاصة، ان ترافق راعي وتتحدث اليه ينسيك هموم الدنيا، فهو لا يهتم بسعر الدولار، ولا بارتفاع الأسعار، ولا بالسياسة كما يقول المثل ( مريح راسو)…

والحديث المدون يخفي كثيرا من جمالية الحديث لا يمكن ان يستلذ بها القارئ الا اذا رافق راع في المرعى لساعة وربما يغريه الأمر ليبقى معه ساعات…

كنا يا ابني نظهر مع الطرشيات دغشي قبل شروق الشمس، نصر الزوادة بالصرة ونعلقها علعصاية ونعبي المطرة مي، اي شو بس العنزات بدن ياكلو ويشربو، نحن جماعة تعيبة…
ما تكون الشمس ارتفعت بالسما شوي يكون الطرشيات شبعو، نردن على النهر نسقيهن لحتى يرتوو، ساعتها نحن نكون مكيفين كثير، هوذي حلالنا ورزقتنا بعدين نرد هل طرش عن النهر ونميل  نلطي   بفية شي شجرة، والطرشايات يقيلو ويرتاحو، محسوبك اقعد اتربع وافلش الزوادة شو يكون فيها؟
صحن مجدرة، حبتين بندرورة، كاسة زيتون، وفحل  بصل… حط بكف ايدي واخبط فحل البص  افخشو واقعد اكول على اقل من مهلي، لما اشبع، جمع شوية حطب واعمل موقدة وعالي ابريق الشاي واشرب كاسة شاي يروق راسي اكثر، اسحب هل منجيرة وبلش انفخ فيها، بتعرف انت المنجيرة صوتا حنون، الله وكيلك حتى الطرشايات يزهزهو على صوتا… وعهل حالة ضل قاعد لتخف حرارة الشمس شوي، قوم كب مي على هل موقدة احسن ما يصير في حريقة، بتعرف عود كبريت واحد بيولع حرش كبير… وارجع اسرح من جديد، ويفلتو هل طرشايات من جديد، ويمشي قدامن الكراز. الكراز هو بلغة اهل التكنولوجيا ( يضحك) القائد او الزعيم كون معلق برقبتو جرس مطرح ما يروح يطن الجرس والطرشيات يلحقو… اي شو هي هيك؟
هلأ احيانا شي عنزة تخلف ابقى ناطرها لتخلص، وهي بتلحوس ابنها وبتنظفو، لما تنظفو الأحقو  فوق كتافي وامشي فيه وهو يمعي….
شو كانو ياكلو الطرشيات والله سؤال وجيه ( يضحك بياكلو همبرغو).. شو بدن ياكلو : عشب من الأرض، انجيل، لفة الشيخ، باقية، شعير، بلوط بيكون واقع تحت الشجر، خرشيف… هيك بياكلو…
والله احيانا المطرة ما تكفي، وكون عطشان بدي بل ريقي، امسك عنزة واحلبها واشرب الحليبات، اي اي بدون تسخين، ولك شو انا المكروب بيقطع فيي؟ هو بس يفوت عمعدتي انا بموتو ( يضحك)
هوذي العنزات برجعن عبيتن هو مسيج حتى ما ينط لجوا الواوي عليهن او الذيب ويخنقهن، بيتن اسمو الزريبة او المشتى…
المرا بتكون ناطرتني لأرجع عشية بتفوت معي الطرشيات علمشتى وبتبلش تحلب فيهن، وبتحطن بسطولة كبيرة، يا بنبيعن حليب، يا بنط فوق الحليب روبة بيصيرو لبن… احيانا بنحط قرص بنجيبو من الصيدلية وبنحط فوق الحليب بيصير جبنة، او بنحط نقطة خل بيمصل الحليب بيروح الدسم لجهة والمي لجهة ثانية وبنصفيهن بالمصفاية، هوذي بنحطن بصحن وبنحط فوقن عسل يا ابو الحبايب والله بينسوك كل تعب نهارك…
اي نسيت قلك احيانا بحمل راديو معي بيضل يطن كل النهار ساعة بسمع صبيح، ساعة وديع الصافي وفهد بلان، هوذي كنت اسمعن، وضلني قلب الراديو من موجة لموجة، وكمان بسمع الأخبار على هذي السايبة اذاعة مونتيكاريو ( مونتي كارلو يا حاج).. ولك شو بعرفني ريتا تقوش ( يضحك)
اي بتذكر مرة وحيدة رحت لعند الحكيم، قلي يا حاج ما تقول عن حالك انك كبرت وتبطل تمشي، لازم عطول تعمل رياضة وتمشي، وجع ضهرك من قلة المشي (يضحك) قلتلو : والله يا حكيم اللي انا بمشيهن بيوم انت ما فيك تمشيهن بشهر ( يضحك)، اصلا اني ما كنت بدي روح لعند الحكيم الا لما زنت على راسي هل مسخوطة بنتي قللت عقلي ورحت، شو بيفهمو الحكيم بهيك قصص، القصة وما فيها اني رفعت حجر تقيل لدكربو من طريق الطرشيات انبرق ضهري صار يوجعني، وهذي البرقة الحكيم ما بيفهمش فيها بدها رقوة..
الرقوة هي بتشق قصبة بالنص وبتحملن بديك التنتين علنص وحدا بيجي بيقرالك قرآن، كلام الله عظيم، يا سيدنا ما انت لما يقرا وتكون مبروق ما بتشوف الا هل قصبات تحركو لوحدن وكتفو فوق بعض مرة لقدام ومرة لورا، الله وكيلك متل ما عم خبرك، ما بيقرالك الآيات مرتين او ثلاثة حتى بترجع مثل الحصان…
لخبرك شغلة مرة صارت معي، انفكشت اجري وما عدت قدرت امشي من الوجع، والا مارق راعي ثاني عيطلو وقلتلو جيب معك فند تين و تعا لقلك ،. والله كلخ فند تين واجا نجرنا خشبة عملناها اسفين، وشقينا الفند بالنص من فوق، وربطت اجري اجلك الله على هل فند، مكنتها منيح، وبلش هو يخبط فوق السفين كل ما يخبط كل ما الرباط يشد على اجري، رح يطف على قلبي من الوجع، لما فات السفين منيح اجا من ورايي مسكني من تحت اكتافي ونتعني لفوق ولورا ،. فقعت اجري فقع ، لما فقعت، مشي الحال، دغري اجا فك الرباط وصبلي فوق منها مي باردة، ارتحت شوي وقمت مشيت دغري وكأني ما اشبني شي،، طيب هذا الحكيم بيعرفلها؟
هذي العملية اسمها بيضحك ( خوزقة)…

بقلم المستشار خليل الخليل

عن kalamhorr

يلفت موقع قلم حر ان المقالات التي ترده ويتم نشرها ليس بالضرورة انها تعبر عن سياسة الموقع الملتزم بالقضايا الوطنية والقومية والإسلامية انما تعبر عن اصحابها الذين يبقون مسؤولين عن كل ما يتعلق بها من الناحية القانونية. كما يهيب بالسادة القراء ان يحتفظوا بالمثل الأخلاقية العليا في تعليقاتهم وعدم التعرض للكرامات الشخصية من الفاظ او تعابير او اشارات نابية مع الاحتفاظ بحق الموقع بمقاضاة كل من لا يلتزم بما ذكر أعلاه

شاهد أيضاً

💢صرخة يوميات ثورة تربوية بقلم مديرة ثانوية شحور الرسمية حنان الزين بري 💢

 ‏”تعالوا نؤجِّل الحسابات الخاصّة ، والمنافع الذاتيّة والآراء الشخصية ، نؤجِّل كلّ شيء ونَهبَّ لإنقاذ …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

WP2FB Auto Publish Powered By : XYZScripts.com